Ministira e Shendetesise

Faqja kryesore - Ligje dhe Dokumenta - Legjislacioni

Adresa: Bulevardi “Bajram Curri” nr. 1 Tirane, Tel ++355 43 62937

	Ligje dhe Dokumenta
	Programi i qeverisë Dokumenta Strategjik Legjislacioni

	Legjislacioni
	LIGJ Nr.9150, datë 30.10.2003 PËR URDHRIN E FARMACISTËVE NË REPUBLIKËN E SHQIPËRISË Në mbështetje të neneve 78 dhe 83 pika 1 të Kushtetutës, me propozimin e Këshillit të Ministrave, K U V E N D I I REPUBLIKËS SË SHQIPËRISË V E N D O S I: KREU I DISPOZITA TË PËRGJITHSHME Neni 1 1. Për ruajtjen e cilësisë së lartë të shërbimit farmaceutik dhe për zbatimin e rregullave të moralit e të etikës profesionale farmaceutike, krijohet Urdhri i Farmacistëve. 2. Urdhri i Farmacistëve është ent publik, i cili përbëhet nga individët, që ushtrojnë profesionin e farmacistit në Republikën e Shqipërisë dhe përfaqëson interesat e tyre profesionalë në nivel partneriteti institucional. Neni 2 1. Urdhri i Farmacistëve ka për mision ruajtjen dhe garantimin e nivelit të lartë të formimit dhe edukimit shkencor e profesional të farmacistëve, ushtrimin e profesionit, sipas kërkesave shkencore, normave të etikës mjekësore e të Kodit të Deontologjisë Farmaceutike Shqiptare dhe mbrojtjen e pacientëve e të konsumatorëve nga kequshtrimet profesionale dhe shkeljet e normave të detyrueshme. 2. Në përmbushje të këtij misioni, Urdhri i Farmacistëve: a) bën regjistrimin e farmacistëve në një regjistër të veçantë; b) mbikëqyr zbatimin e detyrave profesionale, në përputhje me kërkesat e shkencave farmaceutike dhe të legjislacionit farmaceutik; c) bashkëpunon me institucionet arsimore e shkencore për hartimin dhe planifikimin e programeve të formimit shkencor, të specializimit pasuniversitar dhe të kualifikimit të vazhdueshëm të farmacistëve; ç) mbikëqyr zbatimin e kërkesave të Kodit të Deontologjisë Farmaceutike Shqiptare, në mbrojtje të interesave të pacientëve dhe të konsumatorëve; d) jep dhe heq të drejtën vetjake për ushtrimin e këtij profesioni. Neni 3 1. Urdhri i Farmacistëve mbikëqyr respektimin e të drejtave dhe detyrave të personave, që ushtrojnë profesionin e farmacistit në Republikën e Shqipërisë, sipas rregullave të Kodit të Deontologjisë Farmaceutike Shqiptare, për mbrojtjen e popullatës nga kequshtrimi i profesionit dhe cenimet e etikës farmaceutike, si dhe nga veprime të tjera që privojnë kujdesin e nevojshëm farmaceutik. 2. Urdhri i Farmacistëve mbron farmacistët nga veprimet arbitrare të administratës publike ose private për ushtrimin e profesionit. Neni 4 1. Anëtarë të Urdhrit të Farmacistëve bëhen individët, shtetas shqiptarë, të diplomuar farmacistë në Republikën e Shqipërisë ose jashtë saj, që pranojnë Kodin Deontologjik Farmaceutik Shqiptar dhe që e ushtrojnë këtë profesion në sektorin e prodhimit farmaceutik, të shërbimit dhe të shpërndarjes farmaceutike, ambulator e spitalor, publik dhe privat, ose në sektorë të tjerë të shëndetësisë. 2. Përjashtohen nga ky detyrim, por jo nga e drejta e anëtarësimit në Urdhrin e Farmacistëve, farmacistët funksionarë të administratës publike, për sa kohë që ata nuk ushtrojnë veprimtari të mirëfilltë profesionale farmaceutike. Neni 5 Shtetasit e huaj, për ushtrimin e profesionit të farmacistit në sektorin farmaceutik të Republikës së Shqipërisë, janë të detyruar të anëtarësohen në Urdhrin e Farmacistëve, të njohin dhe të zbatojnë Kodin e Deontologjisë Farmaceutike Shqiptare, si dhe të gjitha aktet ligjore e nënligjore që rregullojnë shërbimin farmaceutik dhe atë shëndetësor në Republikën e Shqipërisë. Neni 6 1. Asnjë individ nuk mund ta ushtrojë profesionin e farmacistit në Republikën e Shqipërisë, pa qenë anëtar i Urdhrit të Farmacistëve. 2. Punëdhënësit në institucionet a ndërmarrjet shtetërore ose publike dhe në subjektet private ndalohen t'i punësojnë ata në kundërshtim me këtë dispozitë. 3. Këshilli Kombëtar i Urdhrit të Farmacistëve përcakton kriteret për pranimin e farmacistëve në këtë urdhër. Neni 7 Urdhri i Farmacistëve si institucion, gjatë kryerjes së detyrave, mban lidhje, sipas përkatësisë, me Ministrinë e Shëndetësisë, me institucione të tjera, si dhe me institucione e organizma publikë ose jopublikë, në nivel qendror e vendor. Urdhri i Farmacistëve merr pjesë në hartimin e projektligjeve dhe të dokumenteve të rëndësishme të farmaceutikës shqiptare. Neni 8 1. Urdhri i Farmacistëve ka buxhetin e vet, të cilin e administron në përputhje me rregullat financiare në fuqi. 2. Burimet financiare të Urdhrit të Farmacistëve janë: a) kuotizacionet e anëtarëve; b) tarifat e regjistrimit dhe të dhënies së të drejtës vetjake për ushtrimin e profesionit; c) donacionet e ndryshme vendase dhe të huaja dhe të ardhura të tjera të ligjshme. 3. Të ardhurat e realizuara gjatë ushtrimit të veprimtarisë së vet, Urdhri i Farmacistëve i përdor për të përmbushur misionin e caktuar me këtë ligj. KREU II ORGANIZIMI DHE DREJTIMI Neni 9 Organet kryesore të Urdhrit të Farmacistëve janë: a) asambletë; b) këshillat; c) komisionet disiplinore; ç) Komisioni i Regjistrimit dhe i Dhënies së të Drejtës së Ushtrimit të Profesionit. Neni 10 1. Asambleja e Përgjithshme përbëhet nga anëtarët e këshillave rajonalë. 2. Asambleja e Përgjithshme zgjedh Këshillin Kombëtar. Zgjedhjet për Këshillin Kombëtar bëhen çdo 4 vjet, me të drejtë rizgjedhjeje. Asambleja rajonale përbëhet nga tërësia e përfaqësuesve të anëtarëve të Urdhrit të Farmacistëve të qarkut. Asambleja rajonale zgjedh këshillin rajonal. Zgjedhjet e këshillit rajonal bëhen çdo 4 vjet, me të drejtë rizgjedhjeje. Neni 11 1. Në Këshillin Kombëtar bëjnë pjesë detyrimisht Presidenti i Urdhrit të Farmacistëve, zëvendësi i tij, presidentët e këshillave rajonalë, si dhe nga një përfaqësues nga Ministria e Shëndetësisë, Instituti i Sigurimit Shëndetësor dhe Fakulteti i Mjekësisë. 2. Asambleja e Përgjithshme zgjedh Presidentin dhe zëvendësin e tij me një mandat 4-vjeçar, me të drejtën e një rizgjedhjeje. Funksioni i Presidentit është i papajtueshëm me funksione të tjera drejtuese në administratën publike. 3. Këshilli Kombëtar emëron dhe shkarkon Sekretarin e Përgjithshëm. 4. Këshilli Kombëtar merr vendime, me shumicë votash, kur janë të pranishëm më shumë se gjysma e anëtarëve të vet. Neni 12 Këshilli Kombëtar i Urdhrit të Farmacistëve harton dhe miraton Kodin e Deontologjisë Farmaceutike, si dhe statutin e Urdhrit të Farmacistëve. Neni 13 Këshilli Kombëtar, në përputhje me misionin e Urdhrit të Farmacistëve, të parashikuar në dispozitat e këtij ligji, ka këto përgjegjësi: a) përcakton e miraton strukturën organizative të këshillave rajonalë dhe të Këshillit Kombëtar; b) cakton kuotizacionin dhe tarifën e regjistrimit; c) administron pasuritë e luajtshme dhe të paluajtshme të Urdhrit të Farmacistëve në nivel kombëtar, duke përcaktuar fondet në administrimin e këshillave rajonalë; ç) mbikëqyr të gjitha veprimtaritë dhe administrimin e organeve që varen prej tij; d) mbikëqyr dhe ndërhyn në rregullimin e marrëdhënieve të punës së farmacistëve dhe subjekteve të tyre private me Ministrinë e Shëndetësisë dhe Institutin e Sigurimeve të Kujdesit Shëndetësor. Neni 14 1. Këshillat rajonalë krijohen sipas ndarjes administrative-territoriale. 2. Këshilli rajonal zgjedh presidentin dhe zëvendësin e vet. Mandati i presidentit është 4 vjet, me të drejtën e një rizgjedhjeje. 3. Këshilli rajonal emëron dhe shkarkon sekretarin. Neni 15 Këshilli rajonal, nën mbikëqyrjen e Këshillit Kombëtar, në përmbushjen e misionit të Urdhrit të Farmacistëve, brenda juridiksionit të vet ka këto detyra: a) mbikëqyr dhe ndërhyn në rregullimin e marrëdhënieve të punës ndërmjet farmacistëve, subjekteve të ndryshme private farmaceutike dhe atyre ndërinstitucionale në sektorin farmaceutik e shëndetësor të qarkut; b) administron buxhetin dhe të gjitha pasuritë e Urdhrit të Farmacistëve të qarkut; c) zbaton vendimet e Këshillit Kombëtar dhe rregulloret e udhëzimet e hartuara prej tij; ç) cakton komisionin e regjistrimit të anëtarëve. Neni 16 1. Pranë Këshillit Kombëtar dhe këshillave rajonalë të Urdhrit të Farmacistëve funksionojnë komisionet disiplinore, të cilat caktohen respektivisht nga Asambleja e Përgjithshme dhe ajo rajonale. 2. Komisionet disiplinore janë organe të gjykimit profesional, të cilat verifikojnë dhe shqyrtojnë ankesat për shkeljet e Kodit të Deontologjisë Farmaceutike, si dhe gabimet teknike të farmacistëve gjatë ushtrimit të profesionit. 3. Komisionet disiplinore, pranë këshillave rajonalë, ushtrojnë kompetenca disiplinore të shkallës së parë. Vendimet e tyre janë të apelueshme në komisionin disiplinor të Këshillit Kombëtar, i cili ushtron kompetenca disiplinore të shkallës së dytë. Neni 17 1. Komisioni disiplinor heton dhe gjykon, në mbështetje të fakteve dhe provave të administruara në seancë dëgjimore. Kur vërteton se anëtari ka kryer shkelje të Kodit të Deontologjisë Farmaceutike ose ka bërë gabime teknike, ai jep njërën nga masat e mëposhtme: a) vërejtje me shkrim; b) vërejtje me paralajmërim; c) gjobë nga 10 000 deri 200 000 lekë; ç) shkarkim nga organet drejtuese të Urdhrit të Farmacistëve dhe heqje të së drejtës për t'u rizgjedhur në këto organe për një periudhë deri në 3 vjet; d) përjashtim nga Urdhri i Farmacistëve për një periudhë deri në 3 vjet. 2. Komisioni ka të drejtë t'u caktojë kundërvajtësve, si masë plotësuese, kryerjen e një rikualifikimi në institucionet publike, sipas tarifave të përcaktuara. 3. Masat e mësipërme disiplinore vlerësohen të shlyera, në qoftë se brenda 1 viti nga dita e dhënies së tyre, për shkronjat "a" dhe "b" të këtij neni, dhe brenda 3 vjetëve për shkronjat "c" dhe "d", nuk është marrë ndonjë masë tjetër disiplinore ndaj anëtarit të Urdhrit të Farmacistëve. Neni 18 1. Ankesat kundër vendimeve për marrjen e masave disiplinore nga komisioni disiplinor i këshillit rajonal paraqiten në komisionin disiplinor të Këshillit Kombëtar të Urdhrit të Farmacistëve brenda 30 ditëve nga komunikimi me shkrim i vendimit. 2. Komisioni disiplinor, brenda 30 ditëve nga marrja e ankesës, detyrohet të japë vendimin për ankesën e paraqitur. Vendimi i komisionit disiplinor të Këshillit Kombëtar është përfundimtar. 3. Për masat disiplinore, të parashikuara në shkronjat "c" dhe "d" të nenit 17 të këtij ligji, personi ka të drejtë t'i drejtohet gjykatës brenda 30 ditëve nga data e komunikimit me shkrim të vendimit. KREU III DISPOZITA KALIMTARE DHE TË FUNDIT Neni 19 1. Ministri i Shëndetësisë ngarkohet të ngrejë një komision të përkohshëm, i cili duhet të organizojë zgjedhjet e para të këshillave rajonalë dhe të Këshillit Kombëtar të Urdhrit të Farmacistëve. 2. Këto zgjedhje të bëhen brenda 3 muajve nga data e hyjes në fuqi të këtij ligji. Me zgjedhjen e Këshillit Kombëtar, komisioni i përkohshëm shkrihet. Neni 20 Urdhri i Farmacistëve financohet nga shteti për një periudhë njëvjeçare. Masa dhe mënyra e këtij financimi përcaktohen me akte nënligjore, të nxjerra nga Këshilli i Ministrave. Neni 21 Çdo dispozitë, që bie në kundërshtim me këtë ligj, shfuqizohet. Neni 22 Ky ligj hyn në fuqi 15 ditë pas botimit në Fletoren Zyrtare. Shpallur me dekret nr.4010, datë 18.11.2003 të Presidentit të Republikës së Shqipërisë, Alfred Moisiu.