Ministira e Shendetesise

Faqja kryesore - Ligje dhe Dokumenta - Legjislacioni

Adresa: Bulevardi “Bajram Curri” nr. 1 Tirane, Tel ++355 43 62937

	Ligje dhe Dokumenta
	Programi i qeverisë Dokumenta Strategjik Legjislacioni

	Legjislacioni
	VENDIM Nr. 560, datë 23.10.2000 PËR MIRATIMIN E PROJEKTIT PILOT PËR PËRFSHIRJEN E SPITALIT TË DURRËSIT NË SKEMIËN E SIGURIMEVE TË KUJDESIT SHËNDETËSOR Në mbështetje të nenit 100 të Kushtetutës dhe të neneve 24 dhe 36 të ligjit nr. 7870, datë 13.4.1994, "Për sigurimet shëndetësore në Republikën e Shqipërisë", me propozimin e ministrit të Shëndetësisë, Këshilli i Ministrave V E N D O S I: 1. Miratimin e projektit pilot për përfshirjen e spitalit të Durrësit në skemën e sigurimeve të kujdesit shëndetësor. 2. Miratimin e statutit të spitalit të Durrësit, i cili i bashkëlidhet këtij vendimi. 3. Në kuadër të këtij projekti: - Mbulimi i shpenzimeve të spitalit të Durrësit, me përjashtim të investimeve, të bëhet nga Instituti i Sigurimeve të Kujdesit Shëndetësor, duke filluar nga data 1.1.2001. - Spitali i Durrësit funksionon si institucion shtetëror, jobuxhetor. Spitali do të organizohet dhe do të funksionojë në bazë të statutit. - Instituti i Sigurimeve të Kujdesit Shëndetësor lidh kontratë me spitalin e Durrësit, ku përcaktohen mënyrat e mbajtjes të së dhënave, llogaritja e shpenzimeve, procedurat e paraqitjes së tyre, pagesat dhe rimbursimet, sipas mënyrave të miratuara nga të dyja palët, të drejtat dhe detyrimet e palëve. - Ministrisë së Shëndetësisë i pakësohen 684 punonjës si dhe buxheti përkatës, sipas zërave, duke përjashtuar zërin "Investime", i pakësohen 70 900 000 (shtatëdhjetë milionë e nëntëqind mijë) lekë. - Numrit të punonjësve të Institutit të Sigurimeve të Kujdesit Shëndetësor, të miratuar për vitin 2000, i shtohen 684 punonjës, si dhe kontributi i shtetit për ISKSH-në rritet në masën 70 900 000 lekë. - Instituti i Sigurimeve të Kujdesit Shëndetësor, për të përballuar disbalancimet e buxhetit gjatë vitit, të përdorë fondin rezervë. Pjesa e fondit rezervë, që do të përdoret për këtë qëllim, miratohet nga Këshilli Administrativ i këtij instituti, por pa prekur shumën e financimit të veprimtarisë 3-mujore të tij. - Shpërblimi i punonjësve të bëhet sipas sistemit të sotëm të pagave të punonjësve të institucioneve buxhetore. Me nxjerrjen e rezultatit financiar, spitali ka të drejtën t'i propozojë Këshillit Administrativ të ISKSH-së ndryshime në sistemin e pagave. - Normativat e përdorimit të materialeve, të lëndëve djegëse, të ushqimit, normativat e ngarkesës së personelit mjekësor dhe të punonjësve të tjerë, sipas specialitetit, hartohen nga spitali i Durrësit dhe miratohen nga Këshilli Administrativ i ISKSH-së. - Spitali i Durrësit zbaton tarifat për shërbimet me pagesë, të përcaktuara me vendimin nr.527, datë 1.11.1993, të Këshillit të Ministrave dhe në aktet nënligjore, të nxjerra nga Ministria e Shëndetësisë. Të ardhurat dytësore, të realizuara nga spitali i Durrësit, përdoren nga drejtoria e spitalit, sipas kritereve që përcaktohen me vendim të Këshillit të Ministrave. - Spitali i Durrësit mund të organizojë shërbim special hotelerie në mjedise të veçanta, brenda spitalit. Pacientët, të cilët me dëshirë kërkojnë të trajtohen në këto mjedise paguajnë diferencën ndërmjet kostos faktike të trajtimit dhe kostos spitalore, të miratuar në buxhetin e vitit përkatës. - Ministria e Shëndetësisë dhe Instituti i Sigurimeve të Kujdesit Shëndetësor ushtrojnë kontroll mbi veprimtarinë e spitalit Durrës, në mbështetje të rregullores së spitaleve dhe të statutit të miratuar. - Bordi i spitaleve përgjigjet para Ministrisë së Shëndetësisë për veprimtarinë e spitalit. - Ngarkohen Ministria e Shëndetësisë, Ministria e Financave dhe Instituti i Sigurimeve të Kujdesit Shëndetësor për zbatimin e këtij vendimi. Ky vendim hyn në fuqi pas botimit në Fletoren Zyrtare. KRYEMINISTRI ILIR META STATUTI I SPITALIT DURRËS Neni 1 Spitali Durrës, që më poshtë do të quhet Spitali, është institucion i shërbimit shëndetësor shtetëror me buxhet të pavarur, jo fitimprurës që të ushtron veprimtarinë e tij në bazë të Ligjit bazë të Shërbimit Shëndetësor, të Kushtetutës, në ambientin dhe me pajisjet që janë pronë e Ministrisë së Shëndetësisë. Neni 2 SPITALI është person juridik me qendër në Durrës. Neni 3 - Rregullorja e funksionimit teknik të Spitalit si institucion i shërbimit shëndetësor miratohet nga Ministria e Shëndetësisë. - Rregullorja e funksionimit ekonomiko-financiar të Spitalit, hartohet dhe miratohet nga Bordi i Spitalit. - Normativat e përdorimit të materialeve, lëndëve djegëse, të ushqimit, normativat e ngarkesës së personelit mjekësor dhe të punonjnësve të tjerë sipas specialitetit hartohen nga Spitali i Durrësit dhe miratohen nga Këshilli Administrativ i ISKSH. Neni 4 Spitali drejtohet nga: - Bordi i spitalit - Drejtori Organi më i lartë ekzekutiv i Spitalit është Bordi. Bordi i Spitalit përbëhet nga 11 anëtarë. Përbërja e tij është si më poshtë: - 1 përfaqësues i DSHP-së - 1 përfaqësues i Ministrisë së Shëndetësisë - 1 përfaqësues i Bashkisë Durrës - 1 përfaqësues i Spitalit Durrës (Drejtori) - 2 përfaqësues i BOBSH - 1 përfaqësues i ISKSH - 1 përfaqësues i Urdhërit të Mjekut - 1 përfaqësues i shoqatës së pacientëve - 2 përfaqësues nga sindikatat më të përfaqësuara Neni 5 Secila nga organizatat apo institutcionet e përmendura caktojnë përfaqësuesit e tyre në Bord. Periudha e përfaqësimit në Bord do të jetë 3 vjet. Neni 6 Kryetari i Bordit është përfaqësues i Ministrisë së Shëndetësisë. N/Kryetari zgjidhet nga Bordi. Neni 7 Mbledhja thirret nga Kryetari ose Nënkryetari në mungesë të Kryetarit. Drejtori i Spitalit ka të drejtë të kërkojë mbledhjen e Bordit kur gjykon se kërkohen vendime të shpejta që nuk janë në kompetencën e tij. Mbledhja e Bordit njoftohet me shkrim të paktën 7 ditë përpara duke bërë të ditur dhe rendin e ditës. Kur mbledhja thiret nga Drejtori, kriteri i afatit nuk zbatohet. Neni 8 Mbledhja zhvillohet kur janë të pranishëm 2/3 e anëtarëve, në rast të kundërt mbledhja shtyhet për ditën tjetër duke bërë dhe njëherë lajmërimin. Në këtë rast mjafton gjysma e anëtarëve. Për mbledhjen e Bordit mbahen procesverbal nga një person i pëhershëm i autorizuar nga Kryetari. Vendimet e Bordit nënshkruhen nga Kryetari ose Nënkryetari dhe depozitohen në Spital. Bordi mblidhet jo më pak se 4 herë në vit. Neni 9 Vendimet e Bordit merren me shumicë votash. Çdo anëtar i Bordit ka të drejtën e një vote. Kur votat barazohen, vota e Kryetarit ose Nënkryetarit (në mungesë të kryetarit) është vendimtare. Neni 10 Anëtarët e Bordit marrin një shpërblim për pjesëmarrje, masa e të cilit propozohet nga Spitali dhe miratohet nga Bordi. Neni 11 Funksionet e Bordit janë: - Të kontrollojë drejtimin e veprimtarisë së Spitalit - Propozon në Ministrinë e Shëndetësisë për emërimin ose shkarkimin e Drejtorit, Nëndrejtorit të Spitalit - Përgjigjet për zbatimin dhe kontrollin e politikave shëndetësore të Ministrisë së Shëndetësisë. - Miraton projektin e kontratës që do të lidhet midis Spitalit dhe ISKSH. - Miraton çdo vit raportin vjetor, bilancin, buxhetin vjetor dhe planin perspektiv 3 vjeçar të spitalit të paraqitur nga Drejtori i Spitalit. - Pëërcakton dhe miraton strukturën dhe numrin e punonjësve të Spitalit dhe pagat. Miraton rregulloren e funksionimit ekonomiko-financiar (neni 3). - Shqyrton noramtivat e përdorimit të materialeve, lëndëve djegëse, të ushqimit, normativat e ngarkesës së personelit mjekësor dhe të punonjësve të tjerë sipas specialitetit dhe i paraqet për miratim pranë ISKSH. - Miraton përdorimin e tepricave në fund të vitit. - Harton dhe miraton Rregulloren e funksionimit të Bordit. Neni 12 Anëtarët e Bordit largohen nga detyra kur: - dënohen për vepra penale. - japin dorëheqjen. Neni 13 Emërimi dhe shkarkimi i Drejtorit të Spitalit bëhet nga bordi me miratim të Ministrit të Shëndetësisë. Neni 14 Kompetencat e Drejtorit të Spitalit: 1. Drejtori i spitalit përfaqëson Spitalin si person jurudik. Ai është titullari ekzekutiv që drejton, organizon dhe ka të drejtë të ushtrojë kontrolle mbi veprimtarinë e Spitalit. 2. Raporton të paktën 1 herë në vit për veprimtarinë e Spitalit para Bordit. 3. Përcakton rregulloren e brendshme të Spitalit ose nxjerr urdhëra të brendshëm që rregullojnë veprimtarinë e Spitalit. 4. Ka të drejtë të punësojë personel mjekësor dhe jo mjekësor të Spitalit konform kërkesave të Spitalit. 5. Propozon në Bord buxhetin, paraqet raportin vjetor dhe bilancin financiar. 6. Merr mendime për largime nga puna për shkelje të kontratës, të rregulloreve të shërbimit apo të disipinës. 7. Përfaqëson Spitalin në bisedimet për lidhjen e kontratës midis këtij të fundit dhe DSKSH Durrës, kontratë kjo që përcakton Spitalin dhe DSKSH-në si palë. 8. Ndjek realizimin e treguesve tekniko-ekonomikë të Spitalit, vetë ose me zëvendësat e tij. 9. Nënshkruan të gjithë aktet dhe kontratat që angazhojnë Spitalin ndaj subjekteve ose personave të tjerë juridikë konform legjislacionit në fuqi. Miraton dokumentacionin dhe zbatimin e procedurave të prokurimit publik sipas ligjit në fuqi. Vlefshmëria ligjore e akteve, kontratave dhe procedurave të prokurimeve publike kontrollohen nga Kontrolli i Shtetit Durrës. 10. Përgjigjet para Bordit dhe Ministrisë së Shëndetësisë. 11. Vendos për kualifikimin dhe specializimin e kuadrit të lartë dhe të mesëm sipas nevojave dhe kërkesave të Spitalit. 12. Drejtori kur emërohet merr në dorëzim detyrën dhe kur largohen dorëzon detyrën me proces-verbal. Neni 15 Në Spital funksionon Këshilli Teknik Administrativ me përbërje sipas rregullores së shërbimit të Kujdesit Shëndetësor dytësor të miratuar nga Ministria e Shëndetësisë. Neni 16 Problemet që nuk janë të përcaktuara në këtë statut, rregullohen me vendime të Bordit drejtues brenda dispozitave ligjore dhe kompetencave që i janë dhënë këtij Bordi.